سگریٹ نوشی چھوڑنا بہت سے افراد کے لیے ایک مشکل مرحلہ ہوتا ہے، کیوں کہ نکوٹین کی لت انسان کو بار بار اس عادت کی طرف واپس لے جاتی ہے۔ تاہم طبی ماہرین کے مطابق بعض جسمانی سرگرمیاں اس عادت سے نجات حاصل کرنے میں مددگار ثابت ہو سکتی ہیں۔ جرنل نکوٹین اینڈ ٹوبیکو ریسرچ میں شائع ہونے والی ایک تحقیق میں بتایا گیا ہے کہ اگر سگریٹ نوشی ترک کرنے کے خواہش مند افراد یوگا کو اپنے روزمرہ معمولات کا حصہ بنالیں تو انہیں اس لت سے چھٹکارا حاصل کرنے میں مدد مل سکتی ہے۔ تحقیق کے مطابق یوگا کی مشقیں کرنے سے نہ صرف سگریٹ نوشی چھوڑنے کے امکانات بڑھ جاتے ہیں بلکہ سگریٹ سے دور رہنے کے دوران پیش آنے والی بے چینی، ڈپریشن اور دیگر علامات کی شدت میں بھی کمی آ سکتی ہے۔ محققین نے ماضی میں ہونے والی مختلف تحقیقات کا جائزہ لیتے ہوئے بتایا کہ یوگا کرنے سے تمباکو نوشی سے نجات حاصل کرنے کے امکانات تقریباً 50 فیصد تک بڑھ سکتے ہیں۔ ان کے مطابق یوگا ایک ایسی جسمانی سرگرمی ہے جو ذہنی دباؤ کم کرنے اور خود پر قابو رکھنے میں مدد دیتی ہے، جس سے سگریٹ نوشی چھوڑنے کا عمل آسان ہو سکتا ہے۔ اس تحقیق میں مختلف ممالک سے تعلق رکھنے والے 629 افراد پر کیے گئے 7 کلینیکل ٹرائلز کے نتائج کا تجزیہ کیا گیا، جب کہ مزید تحقیقی رپورٹس کا بھی جائزہ لیا گیا۔ عالمی ادارۂ صحت کے مطابق تمباکو نوشی کینسر، امراضِ قلب اور دیگر کئی خطرناک بیماریوں کا خطرہ بڑھاتی ہے۔ تمباکو نوشی کے باعث پیدا ہونے والی دائمی بیماریوں سے دنیا بھر میں ہر سال لاکھوں افراد متاثر ہوتے ہیں۔ ماہرین کے مطابق سگریٹ نوشی ترک کرنے کے دوران جسمانی اور ذہنی تبدیلیوں کا سامنا کرنا پڑ سکتا ہے، تاہم یوگا، ورزش اور چہل قدمی جیسی سرگرمیاں ان علامات کو کم کرنے میں مدد دے سکتی ہیں۔ اس سے قبل دسمبر 2023 میں آسٹریا کی انسبرک یونیورسٹی کی ایک تحقیق میں بتایا گیا تھا کہ تیز رفتاری سے چہل قدمی کرنے سے سگریٹ پینے کی خواہش میں عارضی کمی لائی جا سکتی ہے۔ اس تحقیق میں بتایا گیا کہ اگر کوئی فرد تمباکو نوشی چھوڑنے کی کوشش کر رہا ہو تو گھر کے اندر یا باہر صرف 10 منٹ کی معتدل ورزش بھی سگریٹ کی طلب کو کم کرنے میں مددگار ثابت ہو سکتی ہے۔ تحقیق میں سگریٹ نوشی کے عادی 16 افراد کو شامل کیا گیا تھا۔ تمام افراد کو رات بھر سگریٹ نوشی سے دور رکھا گیا، جس کے بعد انہیں 10 منٹ تک تیز رفتاری سے چہل قدمی، گھر کے اندر ورزش یا خاموش بیٹھنے کی ہدایت کی گئی۔ نتائج سے معلوم ہوا کہ جسمانی سرگرمی کے بعد سگریٹ پینے کی خواہش میں نمایاں کمی آئی اور سگریٹ چھوڑنے کے دوران سامنے آنے والی علامات کی شدت بھی کم ہوئی۔ تحقیق کے مطابق گھر سے باہر چہل قدمی کے بعد تقریباً 26 منٹ تک، جبکہ گھر کے اندر ورزش کے بعد تقریباً 17 منٹ تک سگریٹ پینے کی خواہش میں کمی دیکھی گئی۔ ماہرین کا کہنا ہے کہ سگریٹ نوشی چھوڑنے کے لیے مضبوط ارادے کے ساتھ صحت مند سرگرمیوں کو معمول بنانا فائدہ مند ثابت ہو سکتا ہے۔ یوگا، ورزش اور چہل قدمی نہ صرف تمباکو نوشی ترک کرنے میں مدد دے سکتی ہیں بلکہ مجموعی صحت کو بھی بہتر بناتی ہیں۔
یہ تحقیق جرنل سائیکوفارماکولوجی (Psychopharmacology) میں شائع ہوئی۔
نوٹ : یہ مضمون طبی تحقیقات اور ماہرین کی عمومی معلومات پر مبنی ہے۔ سگریٹ نوشی چھوڑنے میں دشواری کی صورت میں مستند ڈاکٹر یا ماہر صحت سے مشورہ کرنا بہتر ہے۔
