ڈینگی بخار مچھروں کے ذریعے پھیلنے والی ایک خطرناک وائرل بیماری ہے، جو ہر سال پاکستان، بھارت اور دنیا کے متعدد دیگر ممالک میں لاکھوں افراد کو متاثر کرتی ہے۔ اس بیماری میں عموماً تیز بخار، شدید جسم درد، سر درد، آنکھوں کے پیچھے درد، جلد پر دانے اور فلو جیسی علامات ظاہر ہوتی ہیں، جبکہ شدید صورتِ حال میں خون بہنے، اعضا کے متاثر ہونے اور حتیٰ کہ موت کا خطرہ بھی پیدا ہو سکتا ہے۔ بھارت، جہاں ہر سال ڈینگی کے لاکھوں کیسز رپورٹ ہوتے ہیں، نے پہلی مرتبہ ڈینگی سے بچاؤ کے لیے ایک ویکسین کے استعمال کی منظوری دے دی ہے۔ بھارتی وزارتِ صحت کے مطابق 21 جولائی کو جاپانی دوا ساز کمپنی ٹاکیڈا کی تیار کردہ Qdenga ویکسین کے استعمال کی باضابطہ منظوری دی گئی۔ یہ منظوری سینٹرل ڈرگز اسٹینڈرڈ کنٹرول آرگنائزیشن (CDSCO) نے 4 سے 60 سال کی عمر کے افراد کے لیے جاری کی ہے۔ حکام کے مطابق منظوری سے قبل ویکسین کی افادیت، معیار اور محفوظ ہونے کے حوالے سے مختلف طبی آزمائشیں کی گئیں، جن کے نتائج اطمینان بخش قرار دیے گئے۔ سرکاری بیان میں کہا گیا ہے کہ یہ ویکسین ڈینگی وائرس کی چاروں اقسام کے خلاف تحفظ فراہم کرنے کی صلاحیت رکھتی ہے اور اس کے استعمال سے ڈینگی کی شدید پیچیدگیوں اور اسپتال میں داخلے کے خطرات کم کرنے میں مدد مل سکتی ہے۔
Qdenga ویکسین دو خوراکوں پر مشتمل ہے، جو تقریباً تین ماہ کے وقفے سے لگائی جاتی ہیں۔ اس ویکسین کی تیاری کے لیے جاپانی کمپنی ٹاکیڈا نے بھارتی کمپنی بائیولوجیکل ای کے ساتھ شراکت داری بھی کی ہے۔ رپورٹس کے مطابق اس ویکسین کے استعمال کی منظوری اب تک دنیا کے 42 ممالک میں دی جا چکی ہے، جبکہ عالمی سطح پر اس کی 2 کروڑ 40 لاکھ سے زائد خوراکیں استعمال کی جا چکی ہیں۔ دستیاب معلومات کے مطابق اب تک اس کے کوئی نمایاں یا غیر معمولی مضر اثرات رپورٹ نہیں ہوئے۔ سرکاری اعداد و شمار کے مطابق بھارت میں 2021 سے اب تک ڈینگی کے 10 لاکھ سے زائد کیسز اور تقریباً 1,500 اموات رپورٹ ہو چکی ہیں، جس کے باعث مؤثر حفاظتی اقدامات کی ضرورت مزید بڑھ گئی ہے۔ دوسری جانب بھارت اپنی مقامی ڈینگی ویکسین کی تیاری پر بھی کام کر رہا ہے۔ اگر یہ منصوبہ کامیاب ہوتا ہے تو یہ دنیا کی پہلی سنگل ڈوز (ایک خوراک پر مشتمل) ڈینگی ویکسین ہو گی، جو ڈینگی سے بچاؤ کے میدان میں ایک اہم پیش رفت سمجھی جا رہی ہے۔
